張與辰心痛粉絲一窩心舉動 感激「辰粉」無條件支持：好感動可以成為你哋的家人

張與辰在《中年好聲音3》憑着出色的唱功，被不少觀眾視為大熱門，更指他有機會入選三甲。在最新播出的一集，他與周吉佩自彈自唱演繹Beyond經典歌曲《光輝歲月》，分別彈電子鋼琴和電子結他帶動觀眾和評審隨節奏揮手，成功將現場氣氛推至高潮，亦獲得評判的讚賞，終奪得94分的佳績。

早前TVB舉行《中年好聲音3》14強見面會，張與辰在社交網分享多張相片，感激粉絲無條件的愛和支持，令其感動不已：「首先好多謝我的後援會『與辰同行』半夜1:30就已經到達現場排隊拿靚位。知道你哋帶埋帳幕去打地鋪我真係好感動又好心疼🥺，唔想見到你哋咁辛苦，下次唔好啦 知唔知啊？企遠d都一樣見到我噶，我都會行過黎同大家見面👋同影相。」

張與辰亦晒出收到粉絲送的禮物：「要多謝『與辰同行』活動組每一位家人設計布條、紙牌、燈牌、佈置、錄影、影相、陪伴所有辰粉一齊玩、仲準備埋紀念品派俾大家。真心多謝你地為呢個後援會的付出💖多謝所有嚟參與呢次見面會的辰粉，好多謝你哋的禮物🎁我好鍾意同埋會好好珍惜你地的心意同祝福，但下次真係唔好破費啦。OK？」

他指每次拆禮物和讀粉絲寫給其的信時也會感動流淚：「呢次以為會忍住但都係失敗了，我好感激你哋願意咁信任我，同我分享好多你哋的生命故事。『人生中有歡喜、難免亦常有淚』所有經歷過的唔開心同挫折，都會成就了今日的自己，人永遠不停地成長，哪怕今日已經達到中年，大家都一樣係學習緊點樣去『做人』。」

張與辰感恩能得到大家的厚愛，望用自己的音樂為大家療傷：「我好感動我可以成為你哋的家人，你哋生活裡的一份子，亦都好開心我的音樂可以為你哋療傷，我的傻笑可以帶俾你哋歡樂。我好希望接落黎的日子我可以繼續陪伴住大家，分享你哋的喜怒哀樂，一頁一頁咁寫下每一段美麗的故事。」

延伸閱讀：中年好聲音3丨張與辰周吉佩自彈自唱Beyond名曲《光輝歲月》獲94分 關心妍無可挑剔：畀你吸咗入去