張景淳興奮晒與周潤發合照 自揭曾因對方留下童年陰影：呢件事困擾咗小朋友嘅我好多年

張景淳稱發哥是自己對於戲劇世界的啟蒙，不過有一件事令他蒙上「童年陰影」：「細個小學放學已經有睇下午重播嘅《上海灘》，最後大結局出門口被亂槍掃射係我最難接受，點解主角會結局最後被亂槍掃射，仲無仇報，困擾咗小朋友嘅我好多年。之後睇賭神，我就當許文強係無死到..」

之後，張景淳又細數對於發哥作品的喜愛：「最鍾意嘅係「喋血雙雄」但係睇咗一次之後唔敢再fully睇第二次，結局太慘，之後都係睇一半就停。睇得最開心嗰套係「縱橫四海」發哥加張國榮，無敵。同埋「精裝追女仔」啱啱落機唱馬來亞風光嗰度，細個好似得6-7歲第一次睇笑到真係抽筋連續repeat睇咗20次（當時係睇錄影帶）。而「和平飯店」又係魅力非凡，但又係慘結局..「讓子彈飛」又令人恨之入骨😬發哥戲就係有戲味有電影味🙂‍↕️」

張景淳表示自己對於發哥是由衷佩服：「當年隻身去到美國荷里活，一樣可以喺荷里活資本製作嘅唔單止發哥招牌槍戰動作戲，連文藝片同劇情片一樣係王級演繹。當時係我喺溫哥華讀中學嘅年紀。第一套Replacement Killer我仲好記得喺downtown West Georgia街嘅戲院自己搭車去睇，作為16歲嘅在加港青已經覺得好proud.」。