曾於2006年參加《美女廚房》-- 「美少女廚神爭霸戰」的岑潔儀（Zoey），在成為TVB藝員後，參演過處境劇《同事三分親》，憑劇中Helena一角而逐漸被觀眾知曉。2012年，Zoey與馬來西亞富豪Dixon結婚，並先後育有2個囝囝。自此她便開始淡出幕前，但仍經常在社交平台分享一家日常。近日，Zoey於社交平台發佈影片，透露自己送兒子上課時，無故遭校長呼喝，令她非常不滿，更提醒家長們為孩子找學校時要考慮清楚。
Zoey指自己當時是送兒子去「面試班」上堂，在校內遭一名短髮阿嬸喝停「姐姐，You come here！」。Zoey表示其實對於自己被當作外傭見怪不怪，因為自己成日不化妝：「但我覺得佢態度好差。我就問佢：『你講乜嘢呀？』咁佢就話：『哦，唔好意思呀，媽咪呀，過嚟呢度簽名。』然後我行去簽名，然後畀下學期嘢我，再送個仔落去。我上番去問佢叫咩名，佢答我：『我係呢度校長呀！』」
Zoey表示對校長的態度非常不滿及失望，而她也有考慮是否應該為兒子轉校。：「就算對住姐姐個態度都唔應該咁惡劣啦！我真係打咗個愕然，同埋我要深深再諗阿仔應唔應該再喺呢個面試班上堂囉，我覺得如果佢係呢間學校校長，佢係應該表現出嚟令家長順服或者安心令家長畀小朋友嚟你間學校上堂囉，佢係令我非常之失望！」
不過，雖然被校長「激親」，但Zoey最後仍搞笑自嘲：「唔知我今日呢個look係咪真係好似姐姐？」，更設網上投票，引來老公、細佬及一眾好友都搞笑回應她似姐姐，其實Zoey也擁有四分之一泰國血統。
事件曝光後，引來不少網民留言，Zoey之後再發文回應：「收到好多留言問我係邊一間面試班，我唔想開名因為唔想影響到其他小朋友，我只能講係九龍塘區好出名！」，另外她亦表示自嘲自己似姐姐，只係為了讓大家開心， 真正令她生氣的原因是校長對待他人的態度：「一個唔尊重人嘅人竟然做教育，仲係校長？！佢好意思講出口，我真心佩服！仲有一班覺得佢哋好神嘅家長，希望大家要了解清楚先好報名，唔好好似我咁，朋友話好就去，自己應該了解清楚先，學費都好貴嫁嘛！」
