女神配對計劃｜葉蒨文曾猶豫同GM玩食餅乾 對方私下一句說話解開女神心結：嗰一下釋除晒我所有疑慮

葉蒨文日前（29日）和網民們玩你問我答，和大家分享自己在節目拍攝時的真實感受，但由於問問題的網民實在太多，所以葉蒨文精選了 7 條問題進行解答，她也很用心地回覆了每一條，將自己的心路歷程完完整整地展現在大家面前，並截圖發布在IG上面。

其中有 2 條最為網民所關注。一個是，有網民問葉蒨文怎麼看待最後與曾展望玩食餅乾遊戲，兩人的感受相同？葉蒨文指，其實自己一開始對選了曾展望是有些猶豫的：「因為嗰一朝早Eddie對我嘅關心係無微不至嘅，有好多就算不是在拍攝緊嘅期間，佢對我都好好，萬分照顧！佢亦都非常明白我！相反GM相對同我冇乜交集，我未feel到嗰種主動性，俾我感覺真係有少少粗心同埋口花花，但係實際行動就冇乜嘅感覺。呢啲係個節目度冇呈現到出嚟嘅嘢，但係我自己好真切嘅感受。」

不過曾展望的一個表現卻令葉蒨文認為自己「冇揀錯」：「我揀完出去情緒都仲係覺得好激動嘅時候，GM佢拍一拍我膊頭，同我講佢好明白我嘅感受，因為我會覺得喺兩位嘉賓面前做嗰樣嘢係一種傷害，佢話其實頭先佢都有呢種感覺。佢同我講一句：『我明呀，唔好唔好開心啦，你睇吓我哋幾夾』。我覺得佢搭我膊頭嗰一下真係安慰到我，我真係感受到佢傳遞俾我嘅善意同理解。嗰一下我就釋除晒我所有疑慮，覺得佢係一個可以依靠嘅人。⋯⋯然後再睇返佢嘅分享，我覺得真係好癲，估唔到基本上講嘅嘢係一模一樣。」

另外，有網民問為什麼她聽完Eddie講之後眼濕濕，葉蒨文就表示其實節目剪接出來的東西有限，自己對於Eddie的表現相當滿意，她點名讚賞：「Eddie喺答嗰五條價值觀問題嘅中間，佢都瘋狂同我傾偈，繼續把握時間了解我，甚至我有一種佢好了解我嘅感覺，好多時佢問我嘅嘢佢已經帶住答案，當我認同嘅時候，佢會露出一個好滿足嘅微笑。就算節目組cut咗機，佢都會不斷照顧我，關心我嘅需要，佢亦都俾到我好足夠嘅安全感。」

葉蒨文大讚Eddie的真心實意，以及對自己的肯定，也令不少網民對Eddie有改觀，並表示期待節目後續二人的互動和進展。