/public/tvbcom/article/images/202507/fa3e75bb-b8c6-4bc1-835f-09278a822584.jpg)
葉蒨文（Sophie）剖白分手心路歷程！《女神配對計劃》日前（20日）播出第七集，在大家Camping期間，葉蒨文向大家自揭了一個藏在心裡已久的「秘密」，原來她已有足足六年沒有去過旅行，理由更與前度有關：「我同我EX一齊咗六年半，我係一路想佢帶我去日本，但就係一路等咗好多年都冇實現到…咁啱嗰陣疫情佢有啲困難，或者生意上佢心情各樣嘢都唔係好好，咁我就一路陪住佢啦。」
這番說話一經節目播出，便引起網上熱議，不少網民指想起劇集《愛我請留言》中女主角茹初見（黃翠如飾）與前男友張日熙（洪永城飾）的「日本之約」也是如此，為葉蒨文等不到期待已久的旅行而感到惋惜。
今日（22日），葉蒨文在IG分享長文，剖白選擇分手的心路歷程。首先，她指自己很意外今次在節目裡的分享會得到這麼多人的關注：「星期日嗰集女神配對計劃我最深刻嘅，我以為會係同男嘉賓嘅互動，但係竟然係日本之旅嘅故事，我完全冇諗過節目組會剪落去，我以為嗰一段冇乜同人互動嘅效果，對於其他人嚟可能比較悶嘅內容未必會剪接出來。」
葉蒨文續指，網民的留言支持令她很感動：「講嘅時候我都算淡淡然，睇嘅時候我都冇乜感覺，但係當我見到大家嘅DM同埋評論區嘅留言，我忍唔住眼泛淚光，特別係嗰句: #東京之旅一早比一世遙遠。嗰一下自己好似係全世界面前講咗一樣一路放咗喺心入邊嘅嘢，然後有一種被明白、一種釋放咗嘅感覺，特別係見到有人DM我同我講諗起自己嘅經歷，好明白呢種等待咗另一半好耐嘅感覺。我覺得除咗有人明白，甚至有啲感謝呢啲遠方網友嘅安慰。」
葉蒨文也非常真誠地與大家詳細分享了當時分手時的心路歷程，並向未來男友提出希冀。
全文如下：
「我記得當時我嘅另一半係一位好好先生
大家都會覺得佢好錫我、對我好好
而且佢都係一個冇乜脾氣嘅人
所以一路都會覺得呢段關係一定係佢遷就我比較多
嗰陣時分手
好多人知啲唔知啲在心裏面會judge我: 咁好，你都分手
好似我有毛病咁
好多出面嘅朋友唔係太熟嗰啲
知道我分手嘅呢個消息
都send message嚟一人一句、雪上加霜
大家都係識少少扮代表
安慰我嘅人真係得身邊了解我嘅三五知己同埋老師
我都冇解釋太多
講多無謂
我忠於自己嘅決定
我亦都知道自己點解要咁樣做
我記得當時剛分手的我坐咗喺一間西班牙餐廳入邊
面對住我嘅父母
佢哋看似輕鬆撩我傾偈
然後慢慢由淺入深、步步追問
屋企人問我點解要做呢個決定嘅時候
我睇到佢哋眼神嘅不解同批判
我覺得好難將啲六年半嘅感情逐一訴說
究竟用咩角度講？
就算用咩角度都對呢件事唔公平
既然分開咗我都唔想影響佢哋對我個EX嘅觀感
我亦都覺得有時分開唔係邊一個嘅錯
我淨係知道嗰六年
我見到身邊嘅朋友會同另一半去旅行我都會好羨慕
我都會睇佢哋嘅分享去感受嗰種喜悅
面對一次又一次，日復日、年復年嘅期望落空
一直好努力、堅強咁去支撐住另外一個人
我知道個一種感受只會我自己最明白
於是當時我收起呢一種無人會明白我感受嘅心情
深呼吸一口氣
我最記得我講咗一句:
總之
我等咗六年嘅日本之旅
我知道自己再等唔到落去啦
講完我努力將我眼框裝滿嘅淚水連埋啲食物一齊吞返落去
安安靜靜咁食埋呢餐飯
佢哋亦因為見到我呢個狀態佢哋都冇再問落去
有人問點解唔自己一個去？同朋友去？
咁當然可以咁做啦
但係個重點並唔係去旅行
呢個日本之旅嘅等待係一種象徵
係一種我對於浪漫嘅期許同埋我嘅承諾！
總之
下次如果我有男朋友我一定要佢同我去一次日本旅行！
我想俾佢睇我着和服！
我想同佢去環球影城！
我想影好多靚相留低好多回憶！
就係咁！」
