吳文忻發燒再入院 學習與癌細胞共存：不要輕易被打沉

癌症惡化至四期的吳文忻，昨晚（6日）突晒探熱針相，並探得38度發燒，之後又晒出插打點滴的照片，透露自己再入院，各網友紛紛為她打氣叫其加油！

一直努力抗癌的吳文忻，不時在社交網分享身體情況，近日開Live透露自己在另類治療三管齊下後，現階段就算未能勝仗，但至少減低身上痛楚，亦不用再靠藥物都能每晚安眠，已是極大的幫助。

她指雖然外界覺得認為四期癌症是末期，但她不認同，並表示不要被打沉：「我嘅角度唔係末期，我覺得自己仲係有得醫，可以好返。心態好緊要，千祈唔好畀醫生一啲說話打沉你。之前入院，有個醫生巡房時同我講︰『吳小姐，你都要諗定，到時有咩事嘅話，幫唔幫你插喉？』佢要知道我意願。嗰下聽完，突然感到係咪距離死亡好近，俾醫生一番說話搞到忐忑，當然我亦好明白，呢個係好現實問題，醫生做法係啱。不過我覺得，就算呢度醫生搞唔掂，唔等於其他唔得，所以千祈唔好被打沉，盡力就夠。」

即使癌細胞擴散，她直言現時心態大變，以往經常說同癌細胞打仗，她表示其實打仗都會兩敗俱傷，化療好懷的細胞都會殺死：「我而家會同癌細胞傾偈，我曾經上一啲課堂，知道細胞都有意識，我覺得點解有癌細胞，其實好多時同過往生活習慣唔好，情緒唔好，冇好好照顧內在嘅自己有關，我而家終於明白，所以會同自己講，以後會對你好啲，會愛你多啲，你乖啦！快啲變返正常細胞，或者快啲走，否則冇辦法之下，就要用毒藥毒死（化療）你喇！我不斷同佢傾，其實都可能係一種好好嘅自我治療，你唔係同佢抗衡，而係共存，心態唔同，感覺都唔同。」

延伸閱讀：吳文忻賀嫲嫲99歲生日 分享兩嫲孫趣事勁溫馨：嫲嫲話咬我即係錫我