半息影TVB真情小生宣布全面回歸幕前？ 自爆曾被拍檔騙8位數身家

盧慶輝曾憑TVB處境劇《真情》「唐立生」一角成功入屋，之後出演過《妙手仁心》、《碧血劍》以及《封神榜》等經典劇集。然而， 在他人氣急升時，卻突然在2004年淡出幕前轉行從商，先後投入過金融、餐飲及房地產等生意，對上一部劇集還是他2022年回歸TVB拍攝的《香港人在北京》。如今半息影狀態的盧慶輝日前（8日）在小紅書上載一段短片，似乎預告以演員身分全面回歸。

延伸閱讀： TVB前小生被野生捕獲 曾因拍《真情》爆紅 56歲依舊凍齡獲讚「型男大叔」近年回巢拍《香港人在北京》

他以「大家好我是演員盧慶輝 如果人生可以重來#tvb演員」為標題，片中他回望自己在TVB的十年演藝生涯，他說：「如果人生可以重頭來過， 我會選擇邊一刻重新來過？係1986年參加魅力先生拿冠軍，人生第一部電影《 驚魂今晚夜》？定係在1989年投入金融事業，日夜顛倒，每日瞓得嗰３、４個鐘，錢係賺到，但係搵唔返開心。喺1995年入咗TVB，重新投入我嘅演藝事業，開始了我十年嘅演藝事業，喺呢10年裡面，我係《真情》嘅唐立生、 《花田喜事》嘅小霸王周通、《碧血劍》嘅多爾袞、《萬家燈火》嘅高興、同埋《封神榜》嘅伯邑考，仲有好多個我。」

盧慶輝憶述2005年開始轉戰內地市場，自爆曾被最信任的拍檔騙去千萬身家！他坦言：「喺2004年嘅不辭而別，寄畀我嘅信，我係有keep住，喺嗰段在時間裡面，有你哋嘅陪伴，我覺得真係好珍貴。喺2005年，我嚟咗內地發展，好多嘢要重新去學，搵過錢，亦都蝕底過。最慘嘅時候，畀最信任嘅拍檔呃咗8位數字，亦都好好彩，遇到好多貴人，佢哋都好撐我。」

對於會選擇哪一個時刻重新來過，他表示立足當下拒絕重頭來過：「我諗我都唔會，因為係有過往嘅經歷，先會會成就今日嘅我。 如果前半生我一路喺度追逐名利嘅話，我希望我嘅後半生，可以搵到一啲人生嘅意義同快樂。2025年喇，你哋喺邊？我返咗嚟喇。」片中盧慶輝身穿黑色皮衣型格十足，年屆56歲依舊凍齡。不少網民都紛紛力讚他好有魅力：「帥氣的男人」、「言行舉止很舒服，這個年紀更有魅力」、「歡迎回來」、「支持你！加油！」。