前花旦驚爆患肺炎入院 雙肺已「花」險進鬼門關

姜大衛（John哥）與太太李琳琳相愛半個世紀，二人攜手走過高高低低，是圈中的模範夫婦。近日二人接受好友汪曼玲的YouTube頻道訪問，李琳琳驚爆早前因肺炎險死，情況嚴峻。

李琳琳自爆今年1月曾因肺炎入院6日，由元旦日開始發病，初時不知情況那麼嚴重：「我去睇醫生嘅時候，醫生叫我即刻入院。第二日醫生同護士講，如果佢係第二個，就已經死咗，我先知原來係咁嚴重。醫生真係好有愛心，佢好知道我嘅身體底子，日日交代護士點樣同我用藥。」

姜大衛指當時的X光片顯示太太雙肺已「花」，醫生更一度擔心是癌症，於是另找腫瘤科醫生檢查，慶幸最終證實只是肺炎。

李琳琳又補充除了肺炎，其肺有部分亦有纖維化情況：「我入咗院住咗6日，1月22日出院，但係個人體力已經好弱，肺炎好番，醫生叫我乖乖哋，唔好周圍走，推咗好多約會。」

姜大衛直言當刻感到心力交瘁：「醫院又只可以陪到夜晚，又要顧住佢中午食乜，晚飯食乜，啲仔女又去探佢，不過都唔緊要，知道佢有好轉，可以出院大家都開心。」

李琳琳自言已非首次患肺炎：「一開始個人會灼熱，但又不是發燒，所以已很有經驗。但我習慣拖....拖了幾天才去看醫生。」

她又向愛錫自己的家人道歉：「可能我太唔在乎，近排我都反醒咗，我老公好錫我，啲仔又好緊張我，佢哋緊張我仲多過我自己，所以近排都同佢哋講過幾次sorry，成日要對佢哋咁費心，我個人又執着同任性，又唔識做家務，得到佢哋咁錫我，真係好感動。」

對於太太的任性，姜大衛笑說：「好彩我係曳而唔係任性，如果唔係任性對任性，晨早就分開咗。幾十年大家冇話一定要點，既然佢係咁樣，大家相就，我成日都講兩公婆係互相，我咪遷就佢多啲。」

姜大衛認為兩夫妻會經歷不同階段：「有激情、愛情、感情，依家係互相需要對方，冇可能冇對方嘅時候。我哋淡淡地，自然而然一直走嚟，唔強求都唔會放棄。」

延伸閱讀：女神配對計劃參賽者面試丨姜大衛仔仔姜卓文型格說唱迷暈陳懿德 入得廚房唱得歌仔 目標女神係呢位！