為了令觀眾更深入了解六位主角拍攝《婚後事》時的心路歷程及點滴，myTV SUPER由前日（1日）起、逢周五推出一系列主演對談訪問，打響頭炮的是飾演張明芯的陳自瑤Yoyo及飾演潘善仁的羅子溢。
談到張明芯與潘善仁，不得不談二人於第五集的激情親熱場口，對於之前甚少拍親熱戲的Yoyo來說，她坦言拍攝時對於整個劇組、尤其監製及編審是投以百分百信任票：「所以我從來冇質疑過個劇本我應該係演少啲吖，定唔好演到咁，我哋呢個劇會講好多感情好豐富嘅Moment，就好似善仁同明芯即將要分開、又經歷咗咁多嘢，所以咁樣嘅場口或感情戲、先可以帶到佢同前夫嗰種感覺，我只能盡力調節心態去演好。」之後Yoyo竟拋波給子溢並笑謂：「當然因為你呢個情場老手，真係帶得我好。」子溢聞言先是一秒尷尬，之後再搞笑畀晒反應謂：「我從來冇質疑過自己嘅能力。」
Yoyo續指拍攝《婚後事》時很難抽離，更瘋狂至「每日一喊」：「之前拍劇我可以好快走番出嚟，但呢套劇我同你（指子溢）都真係最多情緒戲同喊戲，個情緒困得太耐，（子溢：「可能一日（喊）幾場」），同真係每一日都有喊戲，就算最簡單嘅戲，都梗有一場（喊戲）。但我覺得係好事，因為我已經喺個角色，我唔想太抽離，我都驚自己入唔番去。」
延伸閱讀： 婚後事劇情｜全20集劇透懶人包 6大主角介紹 陳自瑤羅子溢王敏奕主演
