《再見‧枕邊人》由廖晉碩監製、林麗媚擔任編審，今晚第十八集劇情雖然緊湊兼逢迴路轉，但亦不乏輕鬆搞笑位。前文提要大凌生（張國強飾）為了令兒子Alex（鄭俊弘飾）早日生性，勒令兒子與豪門千金Evelyn（葉蒨文飾）結婚，不過由於Evelyn開出極高門檻的結婚條件，包括身體要夠精壯；深怕mission fail被老竇閂水喉的Alex，只好乖乖地瘋狂健身，務求在身體檢查前作最後衝刺。健身期間，Alex不幸在跑步機上偶遇Evelyn，「小學雞」性格的Alex因不甘被Evelyn睇小、即在跑步機加速向Evelyn挑機，而Evelyn亦不甘示弱與Alex一味鬥加速，結果「得個殼」的Alex最終率先停機投降，而全程囂張又不慌不忙的Evelyn即展現「酷版勝利笑容」。跑步機場口厲害之處是，Evelyn單憑數個眼神及嘴部變化，已演活了高傲富家女的不屑狀態。二人鬥完一大輪後，慘變軟腳蟹的Alex繼續唔認衰，Evelyn見狀藐多兩錢之外，更拋下Alex置之不顧，場景爆笑。
該幕另一焦點落在葉蒨文的好身材上，身穿瑜伽褲的她身形弗爆，不過葉蒨文受訪時透露自己從不會刻意瘦身，更會吃宵夜：「從來唔會控制自己食量，所以體重經常喺47至55kg （103.4至121磅）徘徊，個range 都大，變化取決於嗰排工作量同埋壓力等。」並續指演員僅應該對角色作出身體變化，而非以貪靚為大前提：「我係一個演員，並不是美容KOL，我嘅身形只會服務角色，如果角色需要，先會特登去增肌或者減脂；如果套劇冇特別要求我keep身形，只要體重喺合理範圍內、唔影響我塑造角色呈現出嚟嘅形象，肥與瘦對我嚟講唔係好重要。」她又指平日有做運動習慣，並認為演員定期訓練身體，對於接觸不同角色會有幫助。
