清談節目《Mayanne小喇叭》由麥美恩（Mayanne）擔任主持，曾展望（GM）擔任助理主持，逢周四、五晚10點半翡翠台播映。本周四晚（11日）一集主題是「娛樂圈中真‧友‧情」，邀來林峯及吳卓羲（Ron）兩位好兄弟擔任嘉賓，是次更是二人相隔多年後再在無綫節目中同框。
「Ron峯」應製作組要求翻看當年拍攝《大唐雙龍傳》時露股一幕，面對這幕被傳頌多年的經典場口，Ron爆料指是臨場應導演要求進行拍攝：「初初劇本冇架，佢哋話不如整場令伍姑娘尷尬少少（嘅戲），咁佢有咩會尷尬呢？導演就提議除晒，我就問：『出唔出得街呀？除冇問題吖！我哋咁嘅資質，但點樣遮住前面先？」林峯笑笑口接話：「現場有啲大垃圾膠袋，我哋就剪咗個角落頭落嚟…」Ron再搞笑接著說：「我望住佢剪幾大，我咪再剪大啲，鬥大咯！重點係我哋用牛皮膠紙黐。」林峯即大表認同：「黐嗰陣冇問題，搣嗰時大鑊。」
說得興起的Ron，還大爆搣膠紙時苦況：「要搵𠝹刀𠝹！𠝹咩？毛咯！我哋互幫大家，現場冇人夠膽幫我哋𠝹！」到底二人為何會變得生人勿近，就要留意節目內容。除了經典場口，二人還會分享當年在超過五十度高溫下拍攝苦況，林峯一度問監製「我哋會唔會死」；以及演員及幕後如何在時間緊逼的情況下，靠勁高默契極速在十分鐘內完成一頁半紙劇本拍攝，林峯憶述與楊怡其中一場戲的拍攝情況謂：「我記得嗰時我同阿怡要搶日光，係兩頁紙嘅感情戲，我哋連排連拍半個鐘。」
